er smávaxin jurt af
sefætt sem er algeng um allt land frá láglendi upp í um 600 m hæð.
Það vex oftast í rökum flögum eða hálfgrónum áreyrum. Blómsefið dregur
nafn sitt af blómhlífinni sem er ljósari á lit en á öðrum sefum, og
þekkist vel á því. Líkist nokkuð
flagasefi þegar það er ekki í blómi, en þekkist á
hinu stutta stoðblaði, sem aldrei nær upp fyrir blómin eða aldinin. Í
aldini má einnig greina þau á því, að flagasefið hefur að jafnaði aðeins
tvö aldin (tvíblóma), en blómsefið þrjú eða fjögur.
Blómsefið ber eitt lítið, endastætt blómhnoða með þrem
til fjórum blómum, umlukið brúnleitum blöðum. Blómhlífarblöðin eru sex í
hverju blómi, gulhvít eða bleikleit á litinn, dekkri í endann. Fræflar
eru sex, ein fræva með þrískiptu fræni. Aldinið er dökkrauðbrúnt. Blöðin
eru neðst á stönglinum eða stofnstæð, sívöl.
