Leppmosaætt

Rauðleppur

Scapaniaceae

Rauðleppur (Scapania uliginosa) vex í lindalækjum og fjallatjörnum, marar oft í kafi. Sprotarnir eru dökkir, grænleitir, rauðbrúnir eða brúnir á litinn. Blöðin standa í tveim röðum eftir stönglinum, klofin í tvo misstóra sepa. Blaðseparnir eru breiðir, nær kringlóttir, ávalir í endann, innsveigðir og íhvolfir. Rauðleppur er algengastur á Vestfjörðum og um miðsvæði Austfjarða, en fremur sjaldséður annars staðar á landinu.

Myndin er tekin 5. júlí 2005 skammt frá Kambsá í Laugarbólsdal við Djúp, og var mosinn þarna í blautri mýri með uppsprettum.Vinstri myndin sýnir þétta þyrpingu af sprotum vatnsósa í lindavatni, en til hægri hafa einstakir sprotar verið leystir í sundur.