Lyngmóar

Til baka	Lyngmóar
Lyngmóar eru líklega eitt útbreiddasta gróðurlendi á Íslandi. Þeir eru mjög mismunandi að gerð eftir staðháttum, loftslagi og hæð yfir sjávarmáli. Þessir breytilegu staðhættir ásamt beitarsögu þeirra ráða mjög tegundasamsetningu gróðurfélaganna. Þar sem landið er skjóllítið, á bungum og rindum þar sem snjóinn blæs af landinu á vetrum, eru líkur á að krækilyng, beitilyng og holtasóleyjar séu aðaltegundir þeirra, og ef til vill sortulyng og bláberjalyng. Í skjóllegu landi í lægðum, og þar sem snjóþungt er á vetrum, eða kjarr hlífir gróðrinum er líklegt að bláberjalyng, aðalbláberjalyng ásamt með krækilyngi séu aðaltegundirnar, oft einnig með gulvíði og fjalldrapa. Þar sem loftslag er mjög hafrænt er líklegt að mosarnir hraungambri eða melagambri verði áberandi í þúfum. Til fjalla er líklegt að sauðamergur, mosalyng, grasvíðir eða jafnvel fjallabrúða séu innan um krækilyngið. Þar sem loftslag er landrænt er líklegt að meira sé af holtasóley í berangursmóum en ella, og einnig gætu verið ljósar fléttur eins og skollakræða, hreindýrakrókar og maríugrös innan um.

Lyngmóar með krækilyngi, beitilyngi, holtasóleyjum og hraungambra. Móar af þessari gerð eru oft fremur smáþýfðir.	Samskonar móar í návígi. Auk áðurgreindra tegunda má einnig greina stinnastör og melagambra á myndinni.	Hér eru fléttur mest áberandi í gróðri, einkum hreindýrakrókar. Nokkur hraungambri er á þúfnakollum, grös í dældum en annars krækilyng, gulvíðir og fjalldrapi..
Á myndunum hér að neðan sést til vinstri hvernig landslagið mótar lyngmóana. Á hæðarbrúninni meðfram dældinni eru krækilyngsmóar, en niðri í henni þar sem snjórinn skýlir betur, eru einkum aðalbláberjalyng og bláberjalyng. Hinar myndirnar sýna lyngdældir með bláberjalyngi og aðalbláberjalyngi, fyrir miðju er krækilyng innan um, en til hægri hrútaberjalyng. Aðalbláberjalyng vex á Suðurlandi lítið nema til fjalla eða í djúpum dældum, en í snjóþungum sveitum geta þær hins vegar þakið heilar hlíðar eins og í Böggvisstaðafjalli við Dalvík, og í úthluta Köldukinnar.

Bláberjalyng í botni dældar, en krækilyng á börmunum. Myndin er frá Gemlufallsdal 1968 og efst á myndinni sér upp í Gerðhamrahvilft.	Bláberjalyngsmóar með aðalbláberjalyngi, bláberjalyngi og krækilyngi. Myndin er tekin í Brúnuvík eystra sumarið 2001.	Bláberjalyngsmóar með aðalbláberjalyngi, bláberjalyngi og hrútaberjalyngi. Frá Eyjafirði 1963.