Flóra Íslands  

Enginn veit með vissu hvað íslenzka flóran hefur að geyma margar tegundir af plöntum í víðustu merkingu þess orðs.  Hópur íslenzkra vísindamanna vinnur að því að rannsaka hana betur og betur, og á hverju ári finnast allmargar nýjar tegundir, bæði af sveppum, fléttum og mosum sem ekki var áður vitað að væru til á Íslandi. Það heyrir hins vegar til undantekninga að nýjar blómplöntur og byrkningar finnist, að undanskildum þeim sem maðurinn flytur til landsins.

Eftir því sem bezt er vitað í dag, munu töluvert yfir 5.500 villtar tegundir plantna vaxa í landinu.  Taflan hér til hægri sýnir hvernig tegundirnar skiptast á mismunandi flokka plantna:

Þessar tölur eru að sjálfsögðu afar ónákvæmar, einkum í tveim síðasttöldu flokkunum.  Margir flokkar sveppa eru illa þekktir, enda hefur enginn íslenzkur sérfræðingur lagt stund á marga þeirra. Þegar svo er, er aðeins hægt að byggja á snöggum ferðum erlendra sérfræðinga sem hingað hafa komið, safnað sýnum, og síðan birt greinar um það sem þeir hafa fundið hér.  Svipað er ástatt um meginhluta þörunganna.  Botnfastir sjávarþörungar eru tiltölulega vel þekktir, um 260 talsins, en landþörungar og ferskvatnsþörungar eru afar illa þekktir, enda höfum við aldrei átt sérfræðinga á þeim sviðum. Helgi Hallgrímsson á Egilsstöðum hefur nýlega tekið saman heildarlista yfir land- og ferskvatnsþörunga eftir öllum tiltækum heimildum. Samkvæmt því yfirliti eru þeir um 1400 talsins að meðtöldum hinum stóra hópi kísilþörunga. Sú tala mun þó vera mjög ónákvæm. Af sjávarþörungum eru aðeins botnfastir þörungar landgrunnsins teknir með í þessu yfirliti.  Svifþörungum og kísilþörungum í sjó er alveg sleppt í þessum tölum, enda væri erfitt að draga landamörk þeirra ef út í það væri farið.

Fjöldi plöntutegunda á Íslandi er hlutfallslega lágur miðað við mörg önnur sambærileg svæði með svipuð veðurskilyrði. Skýringu þess er einkum að leita í einangrun landsins og skömmum tíma síðan ísöld lauk, en kuldaskeið ísaldar hafa útrýmt mörgum tegundum, sem síðan hafa ekki átt afturkvæmt.

Síðustu uppfærslur: 9. janúar 2011 var fimm fléttutegundum bætt við, mélubikar, torfubikar, svarðdellu, bleikfles, himnuskóf. Áður höfðu ýmis sveppanöfn verið uppfærð til samræmis við Sveppabók Helga Hallgrímssonar. 7. okt. 2010 var bætt við nýrri grastegund, snoðfingragrasi (Digitaria ischaemum). 22. sept. 2010 var bætt við nokkrum fléttumyndum, og þrjár nýjar tegundir voru settar inn: gljádumba, glitskóf og blikskóf. 17. sept. 2010 var bætt við allmörgum myndum og fjórar fléttur voru settar nýjar inn, flösukrókar, dældaskóf, raufarbikar og tannbikar. 9. maí 2010 var sett inn handrit að flóru Hríseyjar. 6. maí var 11. árg. Ferlaufungs settur inn. 18. apríl 2010 var sett inn Flóra Húnavatnssýslu. 28. feb. 2010 var bætt in upplýsingum um flóruvini á fésbókinni. 22. jan. 2010 voru uppfærðir listar yfir vanskráða 5 x 5 km reiti í reitakerfi LMI. Einnig listi yfir fjölda tegunda skráðar á hvern reit í sama kerfi. Nú eru þar komnar viðhætur frá árinu 2009. 11. sept. 2009 var bætt við síðum fyrir knjápunt og haustlyng. 18. ágúst 2009 var allmörgum myndum af blómplöntum bætt við, og 4 nýjum tegundum að auki, blettafífli, arfafjólu, smánykurrós og þorskagini. 28. júní 2009 var kylfuskán bætt í fléttusafnið. 9. júní 2009 var bætt við 7 fléttutegundum: fölkrímu, jöklamerlu, jökulkrókum, goskrókum, tildurbikar, grástúfum og bjargstúfu. 30. maí 2009 var bætt við 7 fléttutegundum: gráskorpu, randskorpu, náttskorpu, svarðskjóðu, blikuglámu, hraufuglámu og völurílu. 

 Nú eru nánast öll útbreiðslukort blómplantna og byrkninga komin á vefsíðuna. Komnar eru inn upplýsingar um 883 íslenskar tegundir plantna á vefsíðuna.