Skollakambsætt

Skollakambur

Blechnaceae

Skollakambur (Blechnum spicant) er burkni sem er sjaldgæfur á Íslandi.  Hann vex eingöngu á láglendum svæðum (mest neðan 200 m) þar sem snjóþyngsli eru mjög mikil.  Til dæmis er hann með algengari burknum í Héðinsfirði.  Hann vex einnig á Ólafsfirði, Siglufirði, í Fjörðum og sums staðar á Vestfjörðum.  Gróbæru blöðin eru frábrugðin tillífunarblöðunum, þau standa upprétt og eru tindótt eins og tvíhliða kambur. Afbrigðið var. fallax, tunguskollakambur, er smávaxið jarðhitaafbrigði og á því eru gróbæru blöðin eins og hin blöðin. Þetta jarðhitaafbrigði er friðað. 

Kortið hér að neðan sýnir útbreiðslu skollakambs á Íslandi.

Myndin hér að ofan er tekin við Deildartunguhver í Borgarfirði, og sýnir  tunguskollakamb. 

Myndin hér að ofan er tekin í Vattardal í Barðastrandasýslu árið 1985 og sýnir gróbæran skollakamb. Gróbæru blöðin mynda uppréttan kamb, en hin blöðin eru skástæð með breiðari flipa..